«Сайдыс» диэн 2020 сыллаахха регистрацияламмыт үөрэҕирии, наука, оҥорон таһаарыы араас хайысхаларыгар үлэлиэхтээх коммерческайа суох тэрилтэ. «Сайдыс» араас бырайыактарыттан биирдэстэрэ бу сайт буолар. Биһиги, «сайдыстар», саха тылын харыстааһын проблематыттан саҕалаан айти сонун технологияларыгар тиийэ туох билии-көрүү, ситиһии баарын барытын кэрэхсиибит.
Сайт сүрүн сыала-соруга- аан дойдуга, Россияҕа, Саха сиригэр, республика үөрэҕин тэрилтэлэригэр, ол иһигэр биһиги лицей-интернаппытыгар, туох сонун-нуомас, саҥа билии-көрүү, ситиһии баар буолбутун сырдатыы. Маны таһынан, сайт олоххо үөскүүр араас проблемалары быһаарар суолу тобуларга дьон түмсэр түһүлгэтэ буоларыгар баҕарабыт. Сайт араас тематическай салаалардаах (разделы) буолуоҕа. Холобур, «Дьоҕур» общество, «Ийэ тыл», «Саха сирин историктарын уонна кыраайы үөрэтээччилэрин сойууһа», «Түмэн» ыччат түмсүүтэ уо.д.а.
Сайт саха уонна нуучча тылларынан тэҥинэн үлэлиэҕэ. Общество сахалыы тыллаах араҥатын өйө-санаата сайдарыгар, билиитэ-көрүүтэ дириҥииригэр баҕалаах бар дьоммутун туһааннаах салаалар модератордарын кытта сибээстэһэн, сайтка сонуннары ыытан, саҥа ыстатыйалары таһааран сайт үлэтигэр көхтөөхтүк кыттаргытыгар ыҥырабыт.
Уйбаан Шамаев
Бэс ыйын 13 күнэ, 2023 сыл
Чтобы оставить комментарий, нужно авторизоваться